08-Surathul Anfaal -62-75

അധ്യായം-08
 സൂറത്തുൽ അൻഫാൽ
 അവതരണം- മദീന
 സൂക്തങ്ങൾ-75
 62 മുതൽ 75 വരെയുള്ള വചനങ്ങളുടെ അർഥം.



 പരമകാരുണ്യകനും കരുണാനിധിയുമായ അല്ലാഹുവിന്റെ നാമത്തിൽ
( ഞാൻ ആരംഭിക്കുന്നു. ).... 

( 62 ) അവർ താങ്കളെ വഞ്ചിക്കാൻ ആണ് ഉദ്ദേശിക്കുന്നതെങ്കിൽ താങ്കൾക്ക് അല്ലാഹു തന്നെ മതി. 
 അവന്റെ സഹായം കൊണ്ടും സത്യവിശ്വാസികളെ കൊണ്ടും താങ്കളെ ബലപ്പെടുത്തിയവനാണവൻ.... 

( 63 ) അവരുടെ ഹൃദയങ്ങൾക്ക് ഇടയിൽ അവൻ യോജിപ്പ് ഉണ്ടാകുകയും ചെയ്തു. 
 ഭൂമിയിൽ ഉള്ളത് മുഴുവൻ ചെലവഴിച്ചാൽ പോലും, അവരുടെ ഹൃദയങ്ങൾക്കിടയിൽ യോജിപ്പ് ഉണ്ടാക്കാൻ താങ്കൾക്ക് കഴിയുമായിരുന്നില്ല. 
 പക്ഷേ അല്ലാഹു അവർക്കിടയിൽ യോജിപ്പ് ഉണ്ടാക്കി. 
 തീർച്ചയായും അവൻ അജയ്യനും യുക്തിമാനുമാകുന്നു.... 

( 64 ) പ്രവാചകരേ, താങ്കൾക്ക് അല്ലാഹുവും  താങ്കളെ പിന്തുടരുന്ന  സത്യവിശ്വാസികളും തന്നെ മതി.... 

( 65 ) പ്രവാചകരേ, യുദ്ധത്തിന് സത്യവിശ്വാസികളെ പ്രേരിപ്പിക്കുക. 
 നിങ്ങളിൽ ക്ഷമ ശീലരായ 20 പേർ ഉണ്ടായാൽ അവർ 
( ശത്രുക്കളായ )
 200 പേരോട്  ജയിക്കും. 
 നിങ്ങളിൽ ക്ഷമാശീലരായ 100പേർ ഉണ്ടായാൽ അവർ സത്യനിഷേധികളായ ആയിരം പേരോട് വിജയിക്കുതാണ്.
 അവർ യഥാർത്ഥ ബോധമില്ലാത്ത  ജനത ആയതുകൊണ്ടാണത്... 

( 66 ) ഇപ്പോൾ നിങ്ങൾക്ക് അല്ലാഹു ലഘുവാക്കിതന്നിരിക്കുന്നു. 
 നിങ്ങൾക്ക് ബലക്ഷയം ഉണ്ടെന്ന് അവൻ അറിഞ്ഞിട്ടുണ്ട്. 
 അതിനാൽ നിങ്ങളിൽ ക്ഷമാശീലരായ 100 ആളുണ്ടെങ്കിൽ അവർ 200 ആളുകളോട് ജയിക്കും. 
 നിങ്ങളിൽ ആയിരം പേർ ഉണ്ടായാൽ അല്ലാഹുവിന്റെ സഹായത്തോടെ അവർ 2000 ആളുകളോട് ജയിക്കും. 
 അള്ളാഹു ക്ഷമ ശീലരോടൊപ്പമാകുന്നു. 

 വിശദീകരണം.

 65 മത്തെ വചനം സത്യവിശ്വാസികളായ ആളുകൾ പത്തിരട്ടി ശത്രുക്കളോട് പൊരുതണം എന്ന് പറയുമ്പോൾ
 66 മത്തെ വചനം ഇനി അത് ലഘൂകരിച്ച് രണ്ടിരട്ടി മതി എന്ന് പറയുന്നു..
  


( 67 ) ഒരു നബിക്കും 
(ശത്രുക്കളിൽനിന്ന് )
 ബന്ധനസ്ഥരുണ്ടായിരിക്കൽ അനുയോജ്യമല്ല. 
 അദ്ദേഹം ഭൂമിയിൽ ശക്തിപ്രാപിക്കുന്നത് വരെ. 
 നിങ്ങൾ ഐഹിക വിഭവങ്ങൾ ഉദ്ദേശിക്കുന്നു. 
 അല്ലാഹുവാകട്ടെ പരലോകത്തെയാണ് ഉദ്ദേശിക്കുന്നത്. 
 അല്ലാഹു അജയ്യനും യുക്തിമാനുമാകുന്നു.. 

 വിശദീകരണം.

 ബദർ യുദ്ധ സമയത്ത് ശത്രുപക്ഷത്ത് നിന്ന് എഴുപത് ആളുകളെ  തടവുകാരായി സത്യവിശ്വാസികൾ പിടിച്ചിരുന്നു.
 എന്നാൽ അവരെ എന്ത് ചെയ്യണമെന്ന്
 എന്ന കാര്യത്തിൽ അവർക്കിടയിൽ അഭിപ്രായ വ്യത്യാസം ഉണ്ടായി.
 പിഴ വാങ്ങി വിട്ടേക്കണം എന്നായിരുന്നു ഒരു അഭിപ്രായം.
 എന്നാൽ മറ്റു ചിലർക്ക് അവരെ കൊന്ന് കളയണം എന്നായിരുന്നു അഭിപ്രായം.
 എന്നാൽ നബിതിരുമേനി സ്വീകരിച്ചത്.
 അവരെ പിഴ വാങ്ങി വിട്ടയക്കണമെന്ന് ആയിരുന്നു. 
 അങ്ങനെ ആ തടവുകാരെ വിട്ടയക്കുകയും ചെയ്തു.
 ഈ തടവുകാരെ വിട്ടയക്കുന്നതിനെ  സംബന്ധിച്ചാണ് ഈ വചനം.




( 68 ) അല്ലാഹുവിങ്കൽ നിന്നുള്ള മുൻകടന്ന വിധി ഉണ്ടായിരുന്നില്ലെങ്കിൽ നിങ്ങൾ
( മോചനദ്രവ്യം )
 വാങ്ങിയതിൽ കഠിനമായ ശിക്ഷ നിങ്ങളെ ബാധിക്കും ആയിരുന്നു.... 

( 69 ) അതിനാൽ യുദ്ധത്തിൽ പിടിച്ചെടുത്തതും നല്ലതും നിയമാനുസൃതമായ നിലക്ക് നിങ്ങൾ ഭക്ഷിച്ചുകൊള്ളുക. 
 അല്ലാഹുവിനെ സൂക്ഷിക്കുകയും ചെയ്യുക. 
 അല്ലാഹു ഏറ്റവും പൊറുക്കുന്നവനും പരമകാരുണ്യകനും ആകുന്നു... 

 വിശദീകരണം.

 ബദർ യുദ്ധത്തിൽ തടവുകാരായി പിടിച്ചവരെ മോചന മൂല്യം വാങ്ങി വിട്ടയച്ചത്  അത് അക്കാര്യത്തിൽ അല്ലാഹുവിന്റെ മുൻവിധി അങ്ങനെ ആയതു കൊണ്ടാണ്.
 അള്ളാഹു അത് മുൻകൂട്ടി നിരോധിച്ചിരുന്നില്ല. 
 നിരോധിച്ചതിന് ശേഷം ആണ് അങ്ങനെ ചെയ്തിരുന്നെങ്കിൽ തീർച്ചയായും അല്ലാഹു കഠിനമായി ശിക്ഷിമായിരുന്നു. 
 68 വചനത്തിന്റെ  പൊരുൾ ഇതാണ്.
 ഇനി തടവുകാരിൽ നിന്ന് പിഴയായി ലഭിച്ചത് ശരിയായില്ലെങ്കിലും ആ ധനം നിങ്ങൾക്ക് ഉപയോഗിക്കാം.
 എന്നാണ് 69 മത്തെ വചനം പറയുന്നത്.


( 70 ) പ്രവാചകരേ, നിങ്ങളുടെ അധീനതയിലുള്ള തടവുകാരോട് പറയുക. നിങ്ങളുടെ ഹൃദയങ്ങളിൽ എന്തെങ്കിലും നന്മ ഉണ്ടെന്ന് അല്ലാഹു അറിയുന്നു എങ്കിൽ നിങ്ങളിൽ നിന്ന് വാങ്ങിയതിനെക്കാൾ നല്ലത് അവൻ തരുന്നതും, നിങ്ങൾക്ക് പൊറുത്തു തരുന്നതുമാണ്. 
 അല്ലാഹു ഏറ്റവും പൊറുക്കുന്നവനും പരമകാരുണികനും ആകുന്നു.. 

( 71 ) താങ്കളെ വഞ്ചിക്കാൻ ആണ് അവർ ഉദ്ദേശിക്കുന്നത് എങ്കിൽ അവർ ഇതിനു മുൻപ് തന്നെ അള്ളാഹുവിനോട് വഞ്ചന കാണിച്ചിട്ടുണ്ട്.
 അതുകൊണ്ട് അവരെ നിങ്ങൾക്ക് അവൻ അധീനപ്പെടുത്തി തരുകയും ചെയ്തു.
 അല്ലാഹു സർവ്വജ്ഞനും യുക്തിമാനുമാകുന്നു...

( 72 ) തീർച്ചയായും സത്യത്തിൽ വിശ്വസിക്കുകയും, സ്വദേശം വിടുകയും ശരീരംകൊണ്ടും സമ്പത്തുകൊണ്ടും അല്ലാഹുവിന്റെ മാർഗത്തിൽ പോരാടുകയും ചെയ്തവരും 
( മുഹാജിറുകൾക്ക് മദീനയിൽ )
 അഭയം നൽകുകയും സഹായിക്കുകയും ചെയ്തവരും പരസ്പരം ബന്ധുക്കൾ ആകുന്നു. 
 എന്നാൽ സത്യത്തിൽ വിശ്വസിക്കുകയും സ്വദേശം വിടാതിരിക്കുകയും  ചെയ്തവർ  ആകട്ടെ സ്വദേശം വിടുന്നതുവരെ അവരെ രക്ഷിക്കേണ്ട യാതൊരു ബാധ്യതയും നിങ്ങൾക്കില്ല. 
 പക്ഷേ മതകാര്യത്തിൽ നിങ്ങളോട് സഹായം ആവശ്യപ്പെട്ടാൽ അവരെ സഹായിക്കൽ  നിങ്ങളുടെ ബാധ്യതയാണ്. 
 എന്നാൽ നിങ്ങളുമായി കരാറിൽ ഇരിക്കുന്നവർക്ക് എതിരെ അവരെ സഹായിക്കാൻ പാടില്ല. 
 അള്ളാഹു നിങ്ങളുടെ പ്രവർത്തനങ്ങൾ ശരിക്കും നോക്കി കാണുന്നവനാകുന്നു... 

 വിശദീകരണം


 നബിയുടെ സ്വഹാബികൾ മൂന്ന് വിഭാഗങ്ങൾ ആയിരുന്നു. 
 അതായത് സത്യവിശ്വാസം കൈക്കൊള്ളുകയും നാടും വീടും മറ്റും ഉപേക്ഷിച്ച് മദീനയിലേക്ക് പാലായനം ചെയ്യുകയും ചെയ്ത മുഹാജിറുകൾ. 
 രണ്ടാമത്തേത് മുഹാജിറുകളെ  സ്വീകരിക്കാനും സഹായിക്കാനും മുന്നോട്ടുവന്ന അന്സാറുകൾ. 
 ഈ രണ്ട് വിഭാഗങ്ങളും പരസ്പരം ബന്ധുക്കളും രക്ഷാധികാരികളും ആകുന്നു. 
 എന്നാൽ മൂന്നാമത്തെ വിഭാഗം സത്യവിശ്വാസം കൈക്കൊള്ളുകയും ഹിജ്റ ചെയ്യാത്തവരും. അവരെ രക്ഷിക്കേണ്ട ബാധ്യത ആദ്യം പറഞ്ഞ രണ്ടു വിഭാഗങ്ങൾക്കും ഇല്ല. 
 എന്നാൽ വിശ്വാസപരമായ കാര്യങ്ങളിൽ സംശയം വരുമ്പോൾ അവരെ സഹായിക്കാൻ ബാധ്യതയുണ്ട്. 
 പക്ഷേ മുസ്‌ലിംകളുമായി കരാറിലേർപ്പെട്ടവർക്കെതിരെ ആകരുത് സഹായം എന്ന് മാത്രം.... 

( 73 ) സത്യനിഷേധികളും പരസ്പരം ബന്ധുക്കൾ ആകുന്നു. 
 ഇത്
( ഈ പറഞ്ഞ നിർദേശം  )
 നിങ്ങൾ പ്രവർത്തനത്തിൽ വരുത്താത്ത പക്ഷം ഭൂമിയിൽ കുഴപ്പവും വലിയ നാശവും ഉണ്ടായി തീരും... 

( 74 ) സത്യവിശ്വാസം കൈക്കൊള്ളുകയും, സ്വദേശം വിടുകയും അല്ലാഹുവിന്റെ മാർഗത്തിൽ പോരാടുകയും ചെയ്തവരും 
( മുഹാജിറുകൾ )
 അവർക്ക് അഭയം നൽകുകയും സഹായിക്കുകയും ചെയ്തവരും
( അൻസാറുകൾ ) യഥാർത്ഥ വിശ്വാസികൾ തന്നെയാണ്. 
 അവർക്ക് പാപമോചനവും മാന്യമായ ആഹാരവും ഉണ്ട്.. 



( 75 ) പിന്നീട് സത്യവിശ്വാസം സ്വീകരിക്കുകയും, സ്വദേശം വിടുകയും ചെയ്തവർ നിങ്ങളിൽ പെട്ടവർ തന്നെയാണ്. 
 അല്ലാഹുവിന്റെ വിധിയനുസരിച്ച് രക്തബന്ധമുള്ളവർ 
( അനന്തരാവകാശ സ്വത്തിന് )
 പരസ്പരം കൂടുതൽ ബന്ധപ്പെട്ടവർ ആകുന്നു. 
 തീർച്ചയായും അല്ലാഹു എല്ലാ കാര്യങ്ങളെക്കുറിച്ചും ശരിക്കും അറിയുന്നവനാകുന്നു.. 


 വിശദീകരണം


 പിന്നീട് അതായത് ഹുദൈബ്ബിയ സന്ധിക്ക് 
 ശേഷവും മക്കാവിജയത്തിന് മുമ്പായി ഹിജ്റ ചെയ്യുകയും അല്ലാഹുവിന്റെ മാർഗത്തിൽ പൊരുതുകയും ചെയ്യുന്ന സത്യവിശ്വാസികളും നിങ്ങളുടെ കൂട്ടത്തിൽ പെട്ടവർ തന്നെയാണ്. അവരെ സഹായിക്കുകയും രക്ഷിക്കുകയും ചെയ്യേണ്ട ബാധ്യത നിങ്ങൾക്കുണ്ട് എന്നർത്ഥം.
 അനന്തരവകാശ സ്വത്തിന്റ  കാര്യത്തിൽ ഹിജ്റ കൊണ്ടും സഹായം കൊണ്ടും ബന്ധപ്പെട്ടവരെക്കാൾ രക്തബന്ധം ഉള്ളവരാണ് കൂടുതൽ അവകാശപ്പെട്ട അവർ എന്നാണ് ഈ വചനത്തിന് ഒടുവിൽ വ്യക്തമാകുന്നത്. 
 രക്തബന്ധം ഇല്ലാതെതന്നെ മുഹാജിറുകളും അൻസാറുകളും തമ്മിൽ അനന്തരവകാശ സ്വത്തിന് അർഹത ഉണ്ടായിരുന്നു എന്നാണ് നേരത്തെയുള്ള നിയമം
 എന്നാൽ ഈ നിയമത്തോടെ ആ നിയമം ദുർബലമായി... 

Popular posts from this blog

Quran Malayalam